31.12.2023

Aziz hamshaharlar!

Qadrli G‘ozg‘onliklar!

Siz azizlarni, siz orqali butun mamlakatimiz aholisini kirib kelayotgan yangi 2024-yil bayrami bilan chin qalbimdan samimiy qutlayman.

So‘nggi yillarda Yurtimizda amalga oshirilayotgan keng ko‘lamli islohotlar tub zamirida avvalo inson qadri turadi. 

Bundan bir necha yil avval Hurmatli Yurtboshimiz tomonidan G‘ozg‘on atalmish go‘shaga shahar maqomini berilishi bu barchamiz uchun tarixiy qadam bo‘ldi desam, aslo mubolag'a bo‘lmaydi.

Bu esa o‘z navbatida hudud infratuzilmasida misli ko‘rilmagan darajada o‘zgarishlarni amalga oshirishga imkon yaratmoqda.

Xususan, barcha yo‘llarimizning tuproq yo‘llardan shag‘alga, shag‘allashtirilgan yo‘llarni asfaltlashtirilishi, kunduzdek charog‘on ko‘chalar, zamonaviy maktablar, maktabgacha ta'lim muassasalari, tibbiyot majmuasi, zamon talablari asosida bunyod etilgan mahalla fuqarolar yig‘inlari binolarining aholi ixtiyoriga topshirilishi bu fikrimizning yorqin dalili hisoblanadi.
            Birgina, joriy yilda foydalanishga topshirilgan shahar Sport maktabi binosi, zamon talablariga javob beradigan Davlat xizmatlari markazi binosi, yoyinki, bir necha kun oldin yoshlarimiz ixtiyoriga topshirilgan 180 o‘ringa mo‘ljallangan 4-umumiy o‘rta ta’lim maktabi binosining topshirilishi, ayni vaqtda qurilish ishlari amalga oshirilayotgan shahar hokimligi binosi hamda zamonaviy 48 o‘ringa mo‘ljallangan tibbiyot birlashmasi binolari fikrimiz dalilidir. Bir so‘z bilan aytganda G‘ozg‘on shahri ulkan bunyodkorlik maydoniga aylandi.     

Bu ishlarimizni kelayotgan yangi yilda ham tizimli va izchil tarzda davom ettiramiz.

Hurmatli hamshaharlar!

Tobora eshik qoqib kelayotgan yangi 2024-yilni qarshi olishimizga ham sanoqli soatlar qoldi. Yana bir bor kirib kelayotgan yangi yil oilaviy baxt, tinchlik-xotirjamlik, sihat-salomatlik, kelgusi ishlaringizga omad, muvaffaqiyat va zafarlar olib kelishini tilayman! 

Yurtimiz tinch, osmonimiz musaffo bo‘lsin! 

Azim Bazarov

G‘ozg‘on shahar hokimi